政情：摩天「齒輪」鋸政總？
踏入十月中，位於中環海濱嘅巨型摩天輪將會試業，咪以為幸福摩天輪降臨就可以風水輪流轉，為香港沖一沖喜，事關政圈近日流傳呢座摩天輪外形就好似電鋸齒輪咁充滿煞氣，「鋸齒」一旦運作更會「煞」向鄰近嘅添馬艦政府總部及特首辦公室，好唔吉利喎！有堪輿學家就批算，摩天輪形似不斷滾動嘅圓形，破壞代表權力及長官嘅乾位，梁班子以至整個政府可能有影響。
堪輿學家批易有血光之災
高達六十米嘅巨型摩天輪有四十二個車廂，講緊九月完工，最快十月中試業。有政界口痕友擔心，香港正值政改關鍵時刻，又盛傳十月展開政改第二輪諮詢，仲可能發生「佔領中環」行動添，呢個摩天「齒輪」起正特首辦、政府總部及立法會三大權力核心隔籬，由對岸望過去「齒輪」就好似鋸向港府心臟地帶，政改一役分分鐘凶多吉少。
事關香港未來福祉咁大件事，我哋即刻請來堪輿學家李丞責實地視察，批算一下。李丞責攞住羅庚話，摩天輪位於特首辦西北位，西北位為乾位，代表權力及長官，最啱擺座高聳、穩健嘅建築物幫助得權。可惜摩天輪本身唔係固定建築物，更呈不斷轉動嘅圓體，咁就會破壞乾位。加上特首辦西北位有工地，更易有血光、災難同爭吵，統統都對政府不利喎！
圍欄似刀劍 招口舌干戈
撇開摩天輪唔講，李丞責話衙門或處政地方喺風水學上要坐北向南，背靠北斗就最好，但依家特首辦坐南向北，加上門前對正維港，維港屬流動海水，更易令權力不穩。除咗摩天輪呢座「外部勢力」，政總東翼對開近日仲加建圍欄，李丞責形容政總依家屬「囚困之象」，皆因門前築起圍欄即進氣受阻，加上圍欄狀似刀劍，所謂「門前刀劍，口舌必多，干戈門前，是非必然」，難怪香港家衰口不停喇。不過，風水信則有、不信則無，高官切忌迷信。