中環出更：大難臨頭失眠 肥佬黎睇中醫
壹傳媒老闆肥佬黎自從七月底被揭向泛民主派秘密捐款逾四千萬元後，隨即被全城圍剿，更先後兩次接受廉政公署調查。肥佬黎未知係咪自知大難臨頭，繼早前自爆近期飽受失眠困擾，尋日更付諸行動親赴大埔睇中醫接受治療，全程更係心事重重兼頭耷耷，一臉落寞，臉如死灰。
逗留半句鐘 頭耷耷走人
尋日下晝約六時，忽然棄戴鴨嘴帽嘅肥佬黎由司機接載去大埔廣場一間中醫診所，據佢早前喺旗下雜誌撰文，曾透露過「佔領中環」行動發起人之一嘅陳健民介紹佢去大埔睇中醫，相信講緊就係呢一間中醫診所。肥佬黎逗留約半小時後，就繼續頭耷耷攞住一袋疑似係藥嘅嘢返回座駕，由司機載返何文田寓所。
肥佬黎上兩個星期撰文，先寫自己「半夜敲門也不怕」，無懼廉署調查，但隨即又自爆最近兩個月食埋安眠藥都瞓唔着，形容失眠帶畀佢精神同心理上嘅痛苦太難受喎。梗係啦，佢有單政治捐款醜聞纏身，被廉署人員上門搜查，又要親身去廉署受查，唔失眠就奇喇！
卓妮