中環出更：名家配古琴 一奏勝千金
著名大提琴家李垂誼（Trey）繼去年搞音樂節後，今年再添食，將於十一月底舉行一連三場音樂盛會及社區音樂會，參演嘅頂尖音樂家多達三十三位。音樂節另一亮點，係Trey手上嘅古董大提琴，雖然個琴無貼金、無鑲鑽，但系出名門，身價高達千萬港元，名家配古琴，何止繞樑三日？
Trey尋日與垂誼樂社理事會主席蔡關穎琴及一眾知名音樂家為音樂節宣傳。Trey號召力強，一話開騷，俄羅斯國寶級音樂家、中提琴大師及指揮尤利‧巴舒密特都答應同台演出。至於Trey就親自率領八位來自唔同地方嘅音樂家，包括香港鋼琴家李嘉齡及張緯晴等，演奏多首激動人心作品。
李垂誼率眾頂尖樂師演出
演奏功力深厚嘅Trey，技巧高超，而秘密武器係一個跟隨佢兩年多嘅古董大提琴。呢個琴大有來頭，係十九世紀由意大利琴師Goffriller製造，全球只有六十個。Trey手上的琴，曾由法國貴族Gabriac收藏，輾轉流傳到一位收藏家手上，因為賞識Trey嘅才華，慷慨借出一用。
尋日記者會上，Trey就用呢個琴與香港中樂團特約琵琶樂手邵珮儀合奏一曲《天緣》，中西合璧，好比天籟之音。演奏後，Trey小心奕奕地將琴放回琴箱內保存。其實佢都有私伙大提琴，咁蹺近日借咗畀朋友用，笑言音樂家之間互相借琴風氣極為普遍，所謂一奏值千金，傑出音樂家彈過嘅琴，特別值錢喎。
○五年曾在蕭邦國際鋼琴大賽奪獎嘅李嘉齡都來捧場，見佢留咗一把長髮，增添幾分成熟美。大賽後，嘉齡不停周遊世界各地演出，又灌錄個人音樂光碟，奏出彩虹。
卓妮