近年激進泛民勢力抬頭，被視為溫和泛民嘅民主黨（白鴿黨）疑受影響有時都「搞激」，白鴿黨內兩名資深黨員李華明（Fred）同狄志遠（Dick）最近先後出山，不約而同暗批激進泛民近日連串行徑，始終薑係愈老愈辣。
全體立法會議員有機會於下月到廣東訪問，泛民目前初步反應冷淡，一二年棄選立法會選舉嘅阿Fred尋日突然評論事件，直言泛民如果因內地事務而「落閘」，其實有違作為民意代表。阿Fred之後更趁機提到政改，話一個成熟政黨唔應該咁做，要知所進退至得，唔可以當人大常委會有關政改決定唔存在。
另一邊廂，白鴿黨前副主席阿Dick以香港家庭教育學院總監身份發炮，表示大學生搞罷課可以理解，不過中學生就未夠成熟作出判斷，加上罷課影響學業，因此對中學生罷課好有保留喎。
其實，阿Fred同阿Dick兩名資深白鴿同樣係前匯點嘅成員，依家又同樣係政改民意關注組嘅成員，二人前後腳跳出嚟暗批激進泛民，真係心有靈犀嘞。