政黨悶聲發大財
東方報業集團早前獨家報道，政府有意喺二○一六年立法會選舉進行兩項重要改革，第一係將沿用多時嘅五大直選選區劃細做九區，以促進大黨政治，便利政府施政；另一建議係將俗稱「超級議席」嘅區議會（第二）功能界別，由現時嘅五席增至六席，並考慮放寬參選資格至前任民選區議員。有關消息曝光後，「五區變九區」方案一如所料，遭到一眾受影響嘅中小型政團同獨立議員強烈反對，但有關放寛超級參選資格嘅建議，多個受惠黨派同議員都隻字不提，「悶聲發大財」。事件再次證明班議員諗乜做乜，都係自身利益行先，特區管治同市民福祉只係好次要。
參選毋須連任區議員
眾所周知「五變九」方案有利大黨當選，因此除咗直接受惠方案嘅民建聯同民主黨外，建制派嘅工聯會、新民黨同自由黨，以及泛民主派嘅公民黨、工黨、人民力量、社民連同新同盟等，都幾乎一致表態反對。由於該方案須經立法會過半數票通過，單靠民建聯、民主黨，甚至計埋啲唔關事嘅獨立功能界別議員，政府都好難數夠票。估計該方案最後都係講多過做，唔係原地踏步收場，就係中間落墨改為「五區變六區」或「五區變七區」等。
不過，對於改革超級議席嘅方案，情況就啱啱相反，一眾中小型政團不約而同「唔鬧當支持」。梗係喇！將超級議席由五席變六席，仲唔使驚連任唔到區議會議席，只要曾經當選過區議員就可以參選，對於啲地區樁腳較少、每次參選區議會都危危乎嘅政團同議員嚟講，自然有百利而無一害。
議席5變6 民記受損
喺新建議下，先後做中西區山頂選區議員嘅自由黨田北俊同公民黨陳淑莊，一五年唔使再戰區選都可出戰超級，對佢哋個人及所屬政黨都非常有利。上屆為咗參選超級，而焗住「降呢」選番區議會嘅工聯會陳婉嫻，亦唔需要再咁辛苦兩邊走做雙料議員，可以讓番個區議會議席出嚟畀啲第二梯隊上位。另外兩名現任超級議員民主黨涂謹申同民協馮檢基，亦都唔使再擔心因為連任唔到區議員，而喪失參選超級嘅資格。
至於唯一對改革超級議席有保留嘅，正正係最受方案影響嘅民建聯，皆因現有嗰一席區議會（第一）功能界別，本身係民建聯嘅囊中之物。將該議席轉埋做超級，民建聯喺六席超級當中，頂到盡只可「坐一望二」，冇可能好似上屆咁「坐二望三」。如果直選「五變九」方案最後遭到否決，預計該黨就唔會喺超級議席問題上讓步，令立法會選舉改革大計隨時得個吉。