中環出更：象哥接班人 要計出鏡率？
立法會進出口界議員「象哥」黃定光，盛傳會喺一六年立法會選舉退下火線，接班人係離島區議員周浩鼎（Holden）同中華出入口商會副會長許華傑之爭，喺象哥最新出版嘅九月份議員通訊內，就同時見到呢二位疑似接班人嘅身影。有心水清嘅人仲發現，Holden喺通訊內前後出現咗三次，但許華傑就只現身過一次，笑言Holden喺呢場接班人之爭暫被看高一線。
交棒或連任 黃定光至知
不過，亦有人認為以上統計純屬得啖笑，因為如計出鏡率，象哥喺自己本通訊中一定獨佔鰲頭，唔通咁就暗示象哥會繼續爭取連任咩？事實上，象哥早喺○八年已首次傳出有意引退，但最後就不了了之。到一二年再次傳出象哥會退下火線，並親自提名許華傑同香港青年聯會前主席陳仲尼「二揀一」，殊不知最後又係象哥坐多一屆。今次Holden同許華傑能否成功跑出，定係又一次雙雙陪跑，真係只有象哥自己至知。
卓妮