中環出更：賀！專資會八周年 盧偉國彈琵琶

會慶上冠蓋雲集，前任會長胡曉明、上屆會長謝偉銓、常務副會長黃偉雄及中華總商會榮譽會長蔡冠深等人齊現身撐場。精通多種樂器嘅盧偉國上台大顯身手，奏完一曲《平湖秋月》再來多一首《月亮代表我的心》，財經事務及庫務局局長陳家強與發展局局長陳茂波興之所至，拎埋「貓紙」唱埋一份，勁投入。

三個月學識演奏《十面埋伏》

換咗副新眼鏡嘅盧偉國彈到七情上面，佢話多得中五會考後做暑期工賺到少少錢，拜師學琴，估唔到三個月就學曉彈《十面埋伏》，至今仍寶刀未老。盧偉國自爆天生指甲夠硬，彈琵琶時毋須戴假甲。

「樂器王」盧偉國以琵琶演奏一曲《月亮代表我的心》。（溫國佳攝）

容永祺（右）巧遇數口精嘅審計署署長孫德基，互相交流近況。

創會會長容永祺（Samuel）都喺席上，見佢風騷滿面，原來啱啱去完英國出席千金Tiffany的大學畢業禮，順道遊羅馬及米蘭。意大利菜係Samuel至愛，佢把握機會食足十二餐，其中一餐，係去星級餐廳Sabatini嘅羅馬總店「朝聖」，撞啱其中兩位老闆喺店內打躉，更熱情地相擁合照。

卓妮轉頭見到天文台前台長林超英（黑英），講起台灣坑渠油風波掀起滿城風雨，佢皺晒眉，慨嘆社會道德標準跌至新低點，批評商人只顧向錢看，唔理市民死活，認真悲哀。佢自己就少食豬油，怕有肚腩。步入花甲之年嘅「黑英」仲自嘲年紀大，肌肉無彈性，近日搵個教練勤健身，雖然未練出六舊腹肌，不過條腰已瘦咗兩吋喎。

卓妮