政情：政黨約食晏 謝志峰急申報
港台節目《城市論壇》一向都係爭議之地，近年好多建制派大佬，都因為不滿次次出席論壇都畀啲激進泛民示威者辱罵，紛紛婉拒出席論壇論政，因而造就咗多名唔怕畀人鬧嘅建制派第二梯隊成員，成日有機會獲邀出席節目，上電視爭曝光。其中一個論壇常客自由黨青年團，尋日仲約咗論壇主持謝志峰喺節目結束後一齊食晏，謝志峰亦有畀面出席，但係就特登喺論壇上公開申報利益。
為避嫌 講明「AA制」
尋日論壇開始前，謝喺忙於維持秩序之餘，自爆自由黨青年團約咗佢食晏，仲叫有興趣嘅人一齊嚟，以免畀人話佢淨係同某個黨食飯，厚此薄彼。
其實自由黨青年團尋日並冇獲邀上台擔任講者，但亦有到場充當台下觀眾。青年團主席李梓敬透露，佢哋最近啱啱改選，其中副主席楊浩泉銳意同傳媒加強溝通，並特設一筆錢專門請人食飯交流，《城市論壇》成日畀位佢哋上，所以第一炮就想請謝食晏。不過謝就講到明，尋日餐飯係「AA制」，即係自己畀番自己嗰份，以免被指收人好處。