政情：「胡」言亂語 志偉三違反
本報早前獨家報道，政府有意將二○一六年立法會選舉嘅地方直選選區拆細，由五大選區變為九大選區，每區議席數目由五至九席，銳減至三至五席不等。殊不知消息曝光後翌日，民主黨（白鴿黨）胡志偉第一個跳出嚟話拆細選區不利泛民，只會令配票力強大嘅建制派得益。但有心水清嘅人踢爆，白鴿黨一向支持拆細選區，該黨前主席「AV仁」何俊仁其後也疑似「補鑊」，指如建議符合該黨原則唔一定會反對。今次胡志偉亂噏當秘笈，其實係「三違反」，即違反道義、違心言論同違背常理，胡志偉要「升呢」代表個黨立場發言，似乎要再加把勁至得嘞。
無政治道義 枉打滾多年
政府去年進行首階段政改諮詢，白鴿黨當時提交畀當局嘅建議書提議，一六年立法會選舉維持七十席，包括五十席為直選，又特別提到現時比例代表制下部分選區幅員較大而人口較多，議員喺進行選區服務時面對愈來愈大困難，因此建議政府應檢討現時五大選區安排，增加選區數目及調整每選區議席數目，從而令每選區幅員及人口數目相對縮少，呢個恰恰係同政府拆細選區原則一脈相承。
不過事隔唔夠一年，胡志偉好似完全失晒憶，綜合而言係「三違反」，一係「違義」，即係反對該黨有份提出嘅建議，無政治道義；二係「違心」，白鴿黨係眾泛民中擁最多地區樁腳嘅政黨，自然最為着數，分分鐘九大選區都穩佔一席，胡志偉喺政壇打滾十幾年，無理由唔知道拆細選區對大黨有利嘅道理。
竟不知方案有利「地頭蟲」
胡志偉嘅配票益建制派言論仲係「違理」，舉例指一二年新界西直選，民建聯三張名單因白鴿黨配票失當，加上公民黨過多剩餘得票，破天荒連取三席，相反白鴿黨李永達同陳樹英兩張名單雙雙落敗，如果拆細選區，建制派神乎其技嘅跨區配票再無用武之地，到時就考驗地區實力嘅真功夫。
再進一步推論，泛民一眾「地頭蟲」政黨如民協同街工，前者喺深水埗根基穩固，後者喺葵青區固若金湯，一旦拆細選區，佢哋只要喺根據地有足夠支持，基本上唔使分心去周圍拉票，換言之可能更易保住現有議席。胡志偉喺地區打滾多時，今次竟然發表「三違反」言論，認真係老貓燒鬚嘞！