政情：公民廣場明重開玩「宵禁」
港府七月中宣布將人稱「公民廣場」嘅政府總部東翼前地關閉，加設永久性圍欄，原訂於八月底重新開放，唔知係咪擔心全國人大常委會香港政改決定具爭議性，因而推遲重開時間。直至尋日終正式敲定喺明日重開公民廣場，適逢學界近日宣布九二二罷課一周，盛傳「十‧一」會正式佔中，今次避無可避下會否爆發新一輪佔領公民廣場行動，大家要拭目以待嘞。
不准公眾過夜留守
行政署於新聞稿中除咗交代明日重開公民廣場，同時對公民廣場實施諸多限制，首先打算玩「宵禁」，每日晚上十一點至翌日早上六點會關閉，除非有政總或立法會發出嘅有效證件，否則一般人士唔可以喺公民廣場過夜留守。
新聞稿同時列明由本月十四日起，周日及公眾假期嘅上午十時至下午六時三十分內指定時段，公眾人士可以申請於公民廣場集會，如果政府以為定咗咁多框框條款，唔畀公眾人士留守政總就會天下太平，呢個想法相信過分一廂情願嘞。