政情：夏千福學整月餅謀起義？
外部勢力接二連三對香港政改問題說三道四，觸發中國外交部多次出聲促請各國停止干涉香港事務同中國內政，外交部駐港特派員宋哲日前更借中秋為名，喺公署大樓高調宴請七十多名駐港領事館人員，介紹人大常委會決定嘅法律效力，當時最鍾意「搞搞震」嘅美國駐港總領事夏千福都係座上客。不過事隔數日，夏千福又揀正中秋節正日攪局，於社交網站上載多張到聖雅各福群會、學整有機月餅同贈予灣仔區內長者嘅相片。莫非夏千福欲借整月餅，暗示美國即將喺香港策動起義？
對於夏千福高調整餅，網民反應不一，有支持嘅網民稱呼夏千福為「夏督」，力撐佢做港督。亦有網民邀請夏千福「歡迎快點來干預香港內政及普選」，又話相信美國佬整嘅月餅，肯定畀中港台澳嘅月餅更為安全衞生。不過亦有網民寸夏千福，質疑佢唔清楚月餅當初係用作起義。究竟夏千福對月餅嘅政治含義，係真唔知定扮無知，只有佢自己先知道嘞！