中環出更：冇被點名 樹根自組隊淋冰
雖然冰桶挑戰熱潮已逐漸退減，至今已為香港肌健協會籌得逾二千萬元善款，但做善事永遠冇人嫌多或嫌遲。立法會議員鍾樹根尋日就「追水尾」，聯同港超聯球星夏志明、「女拳霸」謝蘊昭同演員馮寶寶一齊淋冰。
鍾樹根等一行人尋日雲集炮台山一間酒吧門外淋冰，原來佢哋幾個都係呢間酒吧嘅常客，經常收工後過去打躉。
夥足球員女拳霸挑戰
有次酒吧老闆夏社強問起佢哋有冇玩過淋冰，講吓講吓，佢哋就決定組隊接受挑戰。不過夏社強尋日臨時縮沙，搵咗囝囝夏志明代父上陣。馮寶寶就因為上周病咗入過醫院，樹根驚佢唔捱得凍，最後勸服佢放棄以免淋親。
樹根直言等咗淋冰呢個機會好耐，可惜遲遲冇人點名挑戰佢，佢話會聯同辦事處職員夾份捐出約二千港元畀香港肌健協會，其中佢自己出一千。謝蘊昭就話，佢哋打開拳嘅身體當然強壯，但同時好少脂肪，唔係好捱得凍，但為咗做善事都冇計喇！
卓妮