中環出更：坑渠油風波 羅台秦感冇面
台灣驚爆無良商人使用坑渠油混入食油風波，牽涉嘅食品、食肆愈揭愈多，遍布港台澳，包括港人至愛嘅手信鳳梨酥。早前港澳台灣慈善基金會（下稱基金會）舉辦聯歡午宴，一眾台灣幫齊現身與逾千名長者賀中秋。基金會副主席羅台秦（Louisa）話，聽到台灣爆出坑渠油風波後覺得好冇面，事關佢一向以台灣人文明善良為榮，點知出現咗啲咁無良嘅商人。台灣同鄉會前會長賴李承美就直言冇得驚，惟有食嘢適可而止，並注意身體嘅新陳代謝，令毒素冇得留低。
賴太話，佢不時採購家鄉水果及美食送禮或自用，好似適逢中秋，佢就訂咗一箱箱台南文旦柚同愛文杧果乾。近期台灣不時爆發黑心食品事件，雖然令人激氣，但就冇影響佢嘅食慾。
激氣完照食鳳梨酥
基金會主席何玉美都話，過往台灣好少發生黑心食品事件，相信今次只係個別事件，事關台灣人一向好注重食品安全及衞生，喺全民監督之下，不肖商人肯定冇容身之處喎。Louisa笑笑口話贊成，所以佢呢頭激氣完，轉頭就食咗塊鳳梨酥。
台灣觀光局駐港辦事處主任巫宗霖亦有到場，佢話嚟緊會喺香港舉行兩場旅遊推廣活動，咁啱爆發坑渠油事件，恐怕令港人信心打折扣，但台灣將採取「面對問題、解決問題」嘅態度，希望長遠為遊客提供優質旅遊環境。
講番今次長者聯歡午宴，出席嘅仲有台北經濟文化辦事處處長嚴重光、基金會創會主席林添茂及副主席李嘉音等。嚴重光對台灣僑界嘅愛心同感驕傲，仲話見到一千二百名長者逼爆會場，好似重現清朝康熙及乾隆皇帝時期嘅耆老御宴「千叟宴」盛況，非常墟冚。
卓妮