政情：收水議員應自我了斷

對市民負責 減政黨傷害

早前捲入捐款醜聞嘅幾位議員，包括工黨李卓人、民主黨涂謹申、公民黨梁家傑及毛孟靜、社民連梁國雄（長毛），雖然長毛同阿人承認收受捐款，其他人矢口否認，但呢件事已令五人形象大插水。潘佩璆唔知係咪靈機一觸，尋日就在社交網站留言獻計話，邊使二十七個泛民議員集體總辭呀，只要涉事（捐款醜聞）嘅幾位議員肯辭職就一天光晒喇！

雖然潘佩璆闊別政界一段時間，但估唔到佢依然咁心水清，話由於年前已經通過「遞補機制」，辭職議員唔可以再喺半年內重選，只能安排黨友或其他友好參選，如果五位捲入政治捐款醜聞嘅議員都一齊辭職，咁樣起碼對市民負責，算係一種「自我了斷」，亦能減少對所屬政黨嘅傷害，總好過事件不斷發酵，等待真正換屆選舉時任由選民懲罰。

如果幾個醜聞議員真係辭職，咁邊個頂上呢？潘佩璆話，可以由上屆選舉落敗嘅泛民人士頂上，因為佢哋好多都無涉及捐款醜聞喎。就咁睇呢點，潘佩璆就似乎未睇得透喇，因為其中一名指被收捐款嘅，正正係前年在選舉大敗嘅公民黨陳淑莊，如果由佢頂上其他公民黨中人，咁醜聞議員辭唔辭職其實無乜分別喎。

補選對建制派未必有利

其實潘佩璆之所以提出呢個方案，好大程度係基於佢睇高建制派選情，佢話一旦有五位議員辭職，補選時建制派可能贏多幾席，屆時泛民輸咗幾席，就算投晒反對票都否決唔到政改方案，咁咪可以一邊鬧，一邊投反對票，但又唔怕做歷史罪人囉！

不過，潘佩璆呢個方案都唔係無風險，選舉嘅嘢有贏就會有輸，無話邊個贏硬嘅，萬一泛民五子辭職後真係贏晒五席，咁建制派只會被捱打，好難作出反擊，再加上派人與泛民對撼等於認同「變相公投」，有關方面係咪容許建制派咁做都係未知之數，睇怕潘佩璆呢個方案，都係得啖笑。