中環出更：副局政助 社企餐廳打躉「派片」
雖然副局長同政治助理都係問責官員，但由於平時出入立法會講解政策都有局長代勞，令佢哋慘被淪為陪襯品，甚至知名度好低。眼見自己去勻大小活動都無助提升知名度，一班副局同政助最近諗到一條好橋，就係閒時去位於金鐘政府總部後面嘅社企餐廳打躉，一見到議員就即衝上前「派片」。
知名度低 主動出擊
副局長同政助嘅知名度低已非新聞，但唔係個個都好似商務及經濟發展局副局長梁敬國咁，因為「有幸」被立法會主席曾鈺成「唔認得」而聲名大噪。與其企喺度等人識，新上任嘅勞工及福利局副局長蕭偉強（Stephen）同政助黎穎瑜（Jade）就決定主動出擊去社企餐廳亮相，一有立法會議員出現就上前傾兩句，博對方日後認得自己。
卓妮上星期有日就見到Stephen同Jade呢對孖公仔出動，適逢金融服務界議員張華峰約咗環境局副局陸恭蕙同政助區詠芷傾偈，Stephen同Jade都唔怕醜上前搭訕兼派卡片，同場仲有民政事務局副局長許曉暉與友人飲茶。如果議員日後搵唔到啲副局政助，可以考慮去社企餐廳搵人。
卓妮