政情：微電影熱 勞聯拍「勞弟」片
近年微電影大行其道，唔少傑作相繼冒出，但跑唔跑得出，就好取決於短短幾分鐘內能否引起社會共鳴，能否成為大家茶餘飯後嘅話題。港九勞工社團聯會最近亦趁慶祝三十周年，一湊微電影熱鬧，以打工仔為對象，特地拍攝咗一齣名為「勞弟」嘅微電影，取其「奴隸」嘅諧音，片名聽落幾有意思。
我哋睇咗預告片，見微電影似乎會以剛畢業嘅年輕人為背景，投入社會工作後嘅情況為題，同現實生活頗為貼近。雖然話行行出狀元，但現實同理想始終有所分別，每年有好多抱住理想畢業嘅學生，最終因為打工時間耐咗，而忘記埋最初嘅夢想，漫無目的咁一直工作。對於點樣喺工作、生活同愛情中取平衡，就唔知勞聯會否在微電影畀到少少貼士大家喇。