政情：政府搵竇防佔鐘
人大常委會對一七年特首普選方案「落閘」，佔領中環（佔中）三子宣布發起一連串抗爭行動，稍後更發起大規模佔中行動。雖然佔中嘅目的地只在中環，並唔係相隔一個地鐵站嘅金鐘政府總部，但由於冇人知佔中規模到底會發展到幾大，更加唔知佔中示威者會否臨時發難走去佔領金鐘，所以政府內部已經為佔中制訂緊急應變策略，一有風吹草動就將寫字樓迅速搬離金鐘一帶，確保政府運作不受影響。
司局職員 分散全港返工
經歷過幾個月前台灣反服貿學生佔領立法院一事，連立法會都即時制訂應變措施，搵定黄竹坑醫學專科學院大樓作為後備開會場地。面對佔中風暴一觸即發，負責進行政改諮詢嘅特區政府根本無可能獨善其身，如果佔中期間有示威者突然心血來潮走去佔領政府總部，喺政府總部返工嘅幾千名公務員就真係企喺度。為以防萬一，據聞上至特首辦公室，下至三司十二局，都已經搵定後備辦公室。
各政策局最近已經向員工發出內部電郵，話若然有朝一日政府總部出現緊急情況，政策局將會在早上用電話、短訊或WhatsApp通知所有文職人員，叫佢哋去另一個寫字樓返工。由於場地所限，三司十二局職員要分散在全港唔同地方返工。據了解，各政策局早在個多月前向轄下機構招手，希望喺佔中期間借用佢哋嘅寫字樓辦公，避免政府大腦運作癱瘓。
允員工帶加密電腦回家
當中食物及衞生局已經搵咗上環林士街一個地方做臨時辦公室，而財經事務及庫務局就心儀港島東一帶，貪佢遠離核心商業區，點佔領都唔會佔到咁遠地方。雖然各政策局已經搵定臨時辦公室，但由於場地始終唔可以容納所有職員，唔少政策局都諗緊可唔可以效法商業機構，容許員工帶政府嘅加密電腦返屋企工作。
帶電腦返屋企固然解決到部分問題，但同時又會衍生保安問題，如果到時有公務員唔小心遺失政府電腦，又被黑客成功破解，咁政府嘅機密資料就好似外國女星裸照流出咁，乜都被人睇晒，到時就更加得不償失喇。