中環出更：南區區會 議員玩舉牌
議會向來予人硬崩崩嘅感覺，但南區區議會就好有創意，日前在區議會網頁上載一張全體議員合照，相中每人都攞住印有唔同圖案嘅紙牌，究竟玩咩呢？南區區議員柴文瀚話，由於區議會開會場地呈長方形，當後排有人舉手發問時，坐喺最前面嘅主席經常因為太遠而睇唔到，於是區議會秘書心生一計，按照每位區議員屆內軼事或關注議題，為佢哋設計獨一無二嘅規程查詢牌。
方便發問 「獨一無二」
好似柴文瀚喺區議會內出名關注南港島線延誤問題，秘書就整咗個印有港鐵圖案嘅規程查詢牌畀佢；議員羅健熙早前喺自己議員辦事處門口被警察查身份證，所以富幽默感嘅秘書就為佢個規程查詢牌整咗個盜賊圖案。之前在海怡西補選中勝出嘅新丁議員陳家珮（Judy），因為在選舉期間着粉紅色戰衣，秘書就整咗個印有粉紅色風褸圖案嘅規程查詢牌畀佢。
至於南區區議會主席朱慶虹個牌又點設計呢？朱主席本身係音樂家，鋼琴演奏同作曲都好耍家，秘書就特別為佢個規程查詢牌加設幾個音符圖案。不過，朱慶虹每次開大會必定坐最前面嘅主席位，咁佢要塊牌嚟做咩呢？其實當扇潑涼都好喎。
卓妮