中環出更：嫌翡翠老土 靚太嘆走寶
近十年來翡翠身價暴升，極具「貴」氣。「翡翠皇后」仁濟醫院前主席董吳玲玲早前在馬會跑馬地會所舉辦一場翡翠分享會，吸引一眾貪靚的城中名人靚太齊歡聚。中華總商會永遠名譽會長蔡冠深太太蔡關穎琴（Janice）自爆當年結婚時，蔡冠深曾提議到緬甸競投未開的玉石，度身定造定情飾物，點知Janice嫌翡翠玉石老土，寧願揀選鑽石。近年翡翠愈升愈有，難怪佢笑嘆當年走晒寶。
蔡關穎琴：平時戴粗嘢
呢場「翡動心弦，翠出人生」分享會係由香港國際翡翠珠寶鑑定中心顧問蘇崇祐主講，佢仲帶來未經雕琢的各種玉石畀大家開吓眼界。董太亦出動私人珍藏，由靚女模特兒行騷展示，令現場增添唔少貴氣。到場嘅仲有大律師陳清霞及南京社團總會會長張心瑜，仲有鍾情設計珠寶的博愛醫院永遠顧問藍國慶太太王雲仙。Janice話，隨着年紀慢慢成熟先至識得欣賞翡翠，但翡翠太矜貴，平時只係穿戴粗嘢，真正靚嘢擺放喺保險箱欣賞喎！
董太的好友香港福建同鄉會永遠名譽會長莊哲猛、莊太駱英英、大女莊菲娜（Fiona）及細女莊莎娜亦去交流心得。Fiona同丈夫百仁基金副會長楊華勇（Johnny）三個月前添咗第二名BB，講起家庭即難掩幸福之情。Fiona話，細仔幾個月大已升格做表哥，因為Johnny家姐亦啱啱添丁，屋企加埋大女共有三個BB，歡笑聲不停，最開心莫過於老爺楊孫西及楊太喇！
卓妮