政情:今日你上鏡:迪園CEO率高層「找數」

「冰桶挑戰」熱潮未退,呢排蔓延到全球主題公園。被海洋公園主席孔令成點名嘅香港迪士尼樂園行政總裁金民豪(Andrew),尋日就搵埋迪士尼一班高層着住米奇同米妮T恤接受挑戰,一人一大桶冰水兜頭淋,「找數」誠意十足。

Andrew話,迪士尼過去兩年都有招待肌健協會嘅受助人同家屬免費入園歡度快樂時光,希望今次活動可以提升公眾對肌萎縮性脊髓側索硬化症(ALS)嘅認識。淋完後,Andrew點名內地長隆集團總裁陳萬成、好友大嶼山發展聯盟主席哈永安及香港旅遊發展局總幹事劉鎮漢。