政情：陳振彬莊偉茵教長者用電器

做善事除咗出錢，出力都好重要。話說中電企業發展總裁莊偉茵（Quince）所屬公司早前透過區議會推薦，向九龍及新界嘅弱勢家庭送贈四千套慳電膽、電飯煲、電風扇及電磁爐，但唔係送咗就算，Quince日前仲拉埋觀塘區議會主席陳振彬（Bunny）去到部分受助者家中，跟進吓受助人係咪安全正確咁使用電器。點知發現真係有長者唔識使用電磁爐，Quince除咗教長者使用外，仲送埋電磁爐專用嘅水煲及單柄鑊。至於身材高大嘅Bunny就幫長者更換天花板嘅慳電膽及裝嵌電風扇，真係夠晒貼心。