政情：主持飯盒會 阿基「三宗罪」
泛民主派政黨每星期都會召開「飯盒會」，就最新形勢交換意見，為咗方便對外表態，各黨每年都會輪流派人做召集人，民協馮檢基（阿基）嘅任期將於九月中屆滿，改由梁家傑出任召集人一職。阿基卸任在即，泛民中人就力數佢「三宗罪」，批評佢唔識主持會議、不時向傳媒透露飯盒會內部機密、又將民協立場講成係飯盒會立場，所以阿基卸任，幾乎個個讚好。
阿基自九十年代初出任立法局議員以來，多年來都係單打獨鬥，在政策議題上勢孤力弱，加上佢在多次政改討論中力主泛民要積極同中央談判，就係所謂嘅「又傾又砌」，令人覺得佢嘅立場搖擺不定，無助揚名立萬。不過，自從佢去年接任飯盒會召集人一職後，可以代表二十三位泛民成員對外講述飯盒會立場，曝光率即時大增。
可惜風光背後總有辛酸事，有泛民中人寸爆阿基唔識得控制飯盒會開會節奏，加上佢性格溫和唔識得「叫停」，由得大家講到「天荒地老」，搞到開會開到天黑都未開完。
逢完會前遭卿姐「訓話」
至於另一宗「罪」，就係阿基不時會唔小心「爆響口」，將飯盒會嘅秘密公開。例如今年一月初，當中聯辦透過立法會主席曾鈺成向泛民「探口風」，問佢哋願唔願意接受中聯辦回請，正當大家在飯盒會上熱烈討論緊去定唔去之時，阿基轉頭就出去同記者講咗，結果令回請一事「見光死」而告吹。事後阿基被泛民鬧爆外，仲搞到曾鈺成嬲爆爆，叫阿基以後唔好亂講嘢。
自呢件事後，每次喺飯盒會完結前，劉慧卿（卿姐）都會向阿基「訓話」，叫佢見記者時慎言。據聞尋日飯盒會開會討論下星期一出席政改簡介會嘅具體部署，當會議完結後，卿姐突然失驚無神爆出一句：「乜都唔好講，連時間都唔好講。」坐喺卿姐對面嘅阿基惟有無奈點頭，事後講多句都唔敢。
馮：從不向傳媒亂講嘢
阿基接受查詢時重申，自己從來都唔會向傳媒亂講嘢，如果會上有人講過有嘢唔可以講，佢就一定就唔會講，而佢又有機制控制開會節奏，總之佢就講到自己非常稱職啦。