中環出更：張華峰遊法 狂掃XXXXL衫褲
身形肥胖嘅人通常都比較難買衫，睇啱咗個款又冇尺寸就最掃興喇，好似金融服務界立法會議員張華峰嘅身形好有分量，買衫都係一件煩惱事。不過，佢幾個月前同議員林健鋒、盧偉國去法國玩時就遇到當地時裝店大減價，仲有大把尺寸係XXXXL嘅款式任揀，確係意外驚喜，明明買完都返轉頭再揀多轉，最後掃咗大批戰利品返香港。
張華峰話︰「平時喺香港買衫，一係未必有鍾意嘅，到鍾意又未必有咁大件。」難得法國啲時裝店有XXXXL尺寸兼仲有大把款式，真係機不可失，唔買就冇喎。佢仲笑笑話，當地最大尺寸並唔係佢着開嘅四個「X」，而係五個「X」，似乎佢覺得自己有繼續膨脹嘅空間咁喎。可能食過翻尋味，佢上月又同家人重遊舊地，唔知今次又掃咗幾多貨呢？
另外，本身係菲律賓華僑嘅張華峰之前在馬尼拉人質事件上都出咗唔少力，又促請菲律賓總商會同菲律賓政府溝通，當地政府今個月就頒咗個象徵榮譽市民嘅「金鎖匙」畀佢。不過，張華峰就話要保持低調，所以費事去攞喎。
卓妮