中環出更：奇！豆腐渣工程獲建築獎提名
「貪曾」前特首曾蔭權爵士任內好大喜功，為求金鐘添馬艦新政府總部「門常開」及立法會大樓趕及喺佢卸任前落成，搞到「門常開」自一一年啟用至今甩漏連連，但最近竟然接連獲得兩個國際建築獎項提名，真係唔知高唔高興嘞。
卓妮尋日早上行經立法會，咁啱見到設計「門常開」嘅建築師嚴迅奇（Rocco）及建築署人員，帶同國際組織城市土地學會（Urban Land Institute）頒發嘅全球卓越獎（Global Awards for Excellence）兩外籍評審委員到場視察，睇見真係一額汗。
佢哋巡視咗「門常開」一至兩個鐘，由頭睇到落尾，視察完立法會會議廳、教育廊等地後，又去咗添馬公園、政府總部及特首辦公室外望一望。
不過，好彩近日天氣唔錯，否則班評審隨時見到政府總部及立法會大樓唔係「門常開」，而係「水長流」，皆因兩大樓啟用至今，都試過漏水。而早前紅黃雨期間，立法會大樓仲滲水添，如果有項評審準則係風水元素，「豬籠入水」就真係贏晒。
卓妮上前同Rocco及團隊傾咗幾句，許李嚴建築事務所董事譚偉霖（William）話，今次評審主要睇公共地方，因為獎項係想彰顯建築物對社區貢獻、保護環境及回應社會需要。佢指出，會議廳引入自然光係創新設計，添馬公園亦可回應市民需求，將行人帶落海濱喎。
指設圍欄不礙評審
講到最近立法會衝擊事件，搞到立法會示威區到依家都仲未可以開放番，政府總部東翼「公民廣場」亦要加設圍欄，咁會唔會影響到「門常開」嘅原意呢？William就話，冇向評審講到加強保安問題，皆因兩人住喺香港最少六年，清楚社會發生咩事喎，而衝擊事件亦同獎項無關。佢又透露，班評審十月會喺紐約舉行會議，到時就會知獎項花落誰家。
卓妮