古人教落，待人以寬，律己以嚴。可惜立法會議員啱啱相反，待人以嚴，律己以寬，講白啲，即係雙重標準，有口話人，無口話自己咯。
嗱，又有一個典型例子嘞。話說港府準備閂水喉，要求各政策局及部門由一六/一七年度起，連續兩個財政年度削減開支百分之一，呢個節流方案雷厲風行，立法會當然不能例外，所以立法會行政管理委員會近日去信委員，諮詢係咪同意削支。根據行管會年報，截至去年三月底，立法會全年開支為六億六千多萬元，如果跟隨削支嘅話，即係兩年合共少用一千三百多萬元，其實款項唔算多，但係班議員一於企硬反對，理由係立法會並非隸屬於行政機關，有其獨特憲制地位，唔可以同其他政府部門相提並論喎，又指如果立法會聽從削支要求，就唔可以履行監察政府責任咁話。
呢啲咪叫雙重標準囉，立法會經常批評政府部門唔肯開源節流，亂花公帑，但係輪到自己被要求節約開支嘅時候，即刻耍手擰頭，諸多藉口，你話係咪離譜吖？正所謂，其身不正，何以正人。立法會現時坐擁一億二千萬元儲備，每年仲不斷獲政府注資，加上每年幾百萬元投資收益，可謂財政穩健，財力雄厚，家陣被要求削支千幾萬元，不過係濕濕碎啫，如果咁都唔肯，以後仲點樣要求港府節流吖。
最好笑嘅係，佢哋連搵藉口都唔識。依家講緊削減開支，節約公帑，同立法會係咪隸屬政府部門有乜關係呢？唔通議員唔係由納稅人出糧？唔通立法會可以洗腳唔抹腳？至於所謂削支就唔可以履行監察政府責任，更加係九唔搭八。咪話功夫茶踢爆，議員反對削支，真正目的唔係為維護立法會嘅獨特憲制地位，只係為維護自己嘅特權咋。先唔講每個議員每月享有八萬多元豐厚月薪，淨係講酬酢津貼咋，每人每年就有十九幾萬元，七十名議員合共花費一千三百幾萬公帑，如果佢哋肯帶頭節約，單係慳番呢筆開支，已經夠冚兩年削支條數有凸啦。政客大花筒，節流話之你，靠佢哋為民謀福祉，簡直嘥氣！
不過話時話，立法會以私利為先，一啲都唔出奇。議會政客向來不務正業，正經事唔做，着數攞到盡，開會唔係遲到早退玩拉布，就係掟蕉爆粗睇鹹相，個個無心政事，懶得就懶，但係講到參加豪華考察團咯喎，就鬼打都無咁精神，人人爭先恐後，舔盡公帑。尤其係嗰班泛民議員，一個二個私下收受淫賤黎嘅黑金，搞到被廉署調查，哄動全城，醜名遠播。咁搞法，唔怪得立法會嘅民望跌到連阿媽都唔認得喇。
不如咁吖，反正立法會慣咗寬己嚴人，索性自行立例容許議員受賄，咁咪可以名正言順收黑金囉。