政情：保養有法 黃汝璞食「三黑」
現代女性愈來愈能幹，不過事業有成之餘亦要講求家庭生活平衡，而保養個人儀容就更加唔少得。尋日香港女工商及專業人員聯會公布新一屆「傑出專業女性及女企業家選舉」嘅得獎名單，選出具卓越專業成就、對社會有貢獻或有創業精神嘅女士，我哋見創會會長黃汝璞雖然年輕時做會計師要日捱夜捱，但依然保養得宜，原來佢對飲食及運動均非常注重，仲每朝都會食黑色嘅早餐嚟護髮添！
要令外表睇上去比實際年齡年輕一啲都唔容易，其中皮膚同髮質好唔好就有好大影響。好多女士去到一定年紀，就傾向將髮型電到好蓬鬆咁，令人感覺頭髮濃密啲，但黃汝璞就應該唔需要喇，事關佢由三年前開始，每日朝早都會食一碗由黑米、黑芝麻、黑豆等材料製成嘅粥，味道比麥皮更香濃，食咗之後感覺髮質強韌咗，所以一直食到依家。
日吃五果兼運動
佢仲日日食五種水果，包括早上食嘅奇異果及藍莓，加上適量運動，難怪皮膚同身形都保持得咁好。