政情：「中年危機」 曾浩輝做義工
衞生防護中心前總監曾浩輝已經退咗休一年半，大家都好關心佢嘅去向。尋日佢出席一個活動時，終於有香港社會醫學學院副會長呢個新身份。曾浩輝笑稱，佢唔會考慮做執業醫生，如果獲邀去大學教書，佢都只會客串吓，唔收錢。佢笑笑口答：「可能係中年危機喇！真係要停一停，諗一諗」。
曾浩輝透露，有朋友想搵佢幫手做嘢，但如果係全職或受薪工作，佢就會拒絕。依家佢做香港社會醫學學院副會長，義務幫手招攬多啲醫生投入癌症、心臟病等專科行列，一樣咁開心。
被問感情事面紅
講講吓，佢慨嘆自己喺職場已打滾二十年，可能係中年危機，對於人生下半場，真係要停一停，諗一諗，因為父母年紀大，佢過去廿年無乜照顧佢哋。
提到最敏感嘅感情事，佢就面紅紅，尷尷尬尬咁話：「呢啲就唔好講喇」。