中環出更：政商界惜食 讚愛心飯盒
慈善機構小寶慈善基金尋日中午喺深水埗一間小學舉行感謝禮，向支持旗下食物回收機構「惜食堂」的社會人士致謝。惜食堂主席梁錦松特別邀請馬會大董陳南祿及行政會議成員陳智思（Bernard）等好友，齊去品嘗由回收食材炮製嘅飯盒。惜食堂創辦人董愛麗（Gigi）透露，十月份將喺深水埗中心廚房附近開設第一間社區中心，令煮好嘅愛心飯盒第一時間送到受惠人手上。
梁錦松就話，惜食堂現時有十八部冷凍及輕型貨車，每日穿梭港九新界向各食肆或超市收集可回收食用嘅食物，送去中心廚房烹調成營養均衡嘅飯餐，再由義工送到基層市民手上。佢話中心現時每日生產四千六百份營養飯餐，每年更加可以回收四千噸剩餘食物，減少廚餘之外又可以幫到人。
「好食過飛機餐」
講完一輪，梁錦松就請Bernard同陳南祿品嘗中心炮製嘅三款飯餐，包括芝麻雞、素菜卷同黃金蝦。食咗唔夠二十分鐘，梁錦松就拉Bernard上台，笑住話「天下無免費嘅午餐」，叫佢同台下觀眾分享飯餐的味道。Bernard即時化身食家，大讚飯餐雖然唔使錢，但用料上乘，廚師亦落足心機，唔會好似出面啲餐廳咁將貨就價。佢愈講愈興起，笑稱覺得飯餐仲好食過國泰航空啲飛機餐喎！做過國泰行政總裁嘅陳南祿聽到即時面露苦笑表情，好尷尬。
惜食堂受到大家的肯定，Gigi真係飲得杯落，不過佢仍未滿足，話雖然依家已經有唔少機構主動接觸佢哋捐出食物，但仍有唔少機構擔心捐出變壞嘅食物會影響機構聲譽，所以寧願將啲食物丟掉，佢希望社會攜手改變態度，更加珍惜食物。
卓妮