荃灣：工程封路 中電延誤捱批
中電於五月下旬在荃灣街市街一段行人路展開電力改善工程，將逾半條行人路暫時圍封。居於區內的陳先生發現，工程原定於七月下旬竣工，惟至八月初仍未完工。陳更發現工程告示顯示竣工日期將延至十月，「工程已經遲咗，依家仲話要多一倍時間先至搞掂，有冇搞錯？」
接投訴後不久即竣工
中電發言人承認，施工期間發現工程範圍地底設施及電纜分布較預期複雜，遂申請延長施工時間。鑑於工程在繁忙狹窄行人路段進行，故已盡量縮小範圍並加快施工，工程已於近日完成。而公司會繼續留意，如施工環境許可情況下盡加派人手，縮短時間，減低影響。
「投訴咗真係見效，好快已經完工，如果唔理就分分鐘可能要等到十月先做完！」陳先生希望中電詳細規劃工程，並加強監管施工情況，避免工程延誤。