西貢：商戶餵飼野鳥 恐傳播禽疫
「個商場有雀仔飛入嚟我就預咗，但諗唔到有店主竟然餵嘢畀佢哋食，又唔知雀仔有菌，引晒入嚟播菌就好得人驚啦！」劉先生指西貢高勝樓一樓商場採開放式走廊設計，野鳥可輕易飛入商場內，近日發現有商戶於店外擺放食物餵飼野鳥，擔心此舉或增加傳播禽流感風險。
市民促漁護署檢控
漁農自然護理署發言人證實，今年共接獲兩宗涉及上址的相關投訴，強調接獲轉介後已即時派員到場抽取鳥糞樣本進行禽流感測試，兩次化驗均呈陰性，又表示會通知大廈管業處加強留意。惟發言人並無正面回應有關餵飼行為是否違法。
劉先生直言對漁護署回應大感不滿，「即係將個波交畀大廈管理處就當做咗嘢，咁樣將個責任推嚟推去，對件事一啲幫助都冇！」劉先生建議漁護署應盡快檢視相關法例，如證實有人違例，應盡快作出檢控，保障市民健康。