講起「蒙古大夫」，係人都知係指瞞瞞騙騙、濫竽充數嘅庸醫，唔救人專害人嗰隻。不過咪以為蒙古大夫係蒙古獨有喎，今時今日本港嘅公立醫院，一樣充斥蒙古大夫嘅咋！
嗱，一講曹操，曹操就到，有位高先生就係受害者。佢因為右腳乏力，早前向私家診所求醫，醫生診斷為中風，轉介北區醫院跟進治療。殊不知，北區醫院嘅醫生淨係幫高先生做完腦掃描後，就一口咬定只係「神經線壓住小腿」，仲輕描淡寫咁話，只要做個小手術同物理治療就會好番喎。
如果病情真係比想像中輕微，梗係值得高興啦，可惜高先生嘅情況急轉直下，唔止右腳企唔穩，甚至連右手都出現乏力徵狀。醫生喺呢個時候先至安排做磁力共振檢查，結果唔查猶自可，一查嚇一跳，原來高先生唔係小腿壓住神經線，而係缺血性中風，隨時搞出人命。最離譜嘅係，醫生事後仲若無其事話已經耽誤咗時間，高先生唔可以接受注射治療，只能靠食藥保命咋。
本來中風唔係乜嘢奇難雜症，喺香港好普遍啫，北區醫院咁都斷錯，唔係蒙古醫生又係乜。正如有人話齋，只要一早做磁力共振，好快就可以確診，北區醫院只做腦掃描就得出結論，簡直靠害！所以話啫，病人最慘唔係生病，而係生病之餘仲要碰着個黃綠醫生，救人隨時變害人。照咁睇，「生不入官門，死不入地獄」已經Out嘞，家陣要改成「生不入公院，死不入地獄」就差唔多。
咁又係呀，公立醫院醫療事故層出不窮，斷錯症當食生菜，沒有最離譜，只有更離譜。呢，前一排之嘛，聯合醫院先有一個病理專科醫生，被揭發八個月內寫錯百幾份病理報告，搞到有乳癌病人被錯診，又有病人連子宮都要切除，仲有幾個病人莫名其妙死亡添，唔係草菅人命係乜吖！
話時話，本港醫療系統烏煙瘴氣，七國咁亂，得人驚嘅公立醫院又點止嗰一兩間吖。醫護人手長期短缺，醫療設施殘殘舊舊，醫療事故長揭長有，打錯針、派錯藥、輸錯血、做錯手術、切錯器官等等，簡直無奇不有，令人嘆為觀止。曾幾何時，香港醫療水平喺亞洲首屈一指，成為港人嘅驕傲，點知時移勢易，醫療質素每況愈下，醫療事故鑊鑊新鮮鑊鑊甘，真係講起都一殼眼淚。
一葉知秋，醫療事故並非偶然，而係公營醫療系統病入膏肓嘅反映。講到尾，醫管局管理混亂，一味肥上瘦下，先至係罪魁禍首。家陣伊波拉病毒來勢洶洶，當局再唔整頓醫管局，叮走庸官，整頓庸醫，沙士慘痛一役隨時重演，民望高企嘅高局長，係時候做嘢嘞！