政情：民陣改選陳倩瑩競逐召集人
佔領中環如箭在弦，民陣作為搞開遊行示威嘅組織，相信都會好忙。不過，佢哋一年一度嘅改選亦即將在下月底舉行，我哋聽聞正副召集人都會齊齊落莊，咁咪即係要陣前易帥？不過，似乎易帥一事即將明朗化，皆因傳聞兩名有意擔任召集人之中，現任副召集人王浩賢已表明冇興趣競逐，所以令曾任學聯秘書長嘅陳倩瑩（Daisy）接班呼聲較高。
王浩賢話太忙唔選
Daisy在一一年替補機制論壇被控擾亂公眾秩序罪，上訴後脫罪，依家做緊立法會社福界議員張國柱助理。佢話今年係政改年，民陣想搵番個熟手人，而佢喺民陣咁耐，都未參選過，係時候接受挑戰，預計下月中會報名。
至於王浩賢就話冇諗過競逐，一來依家讀緊法律，二來又做緊會計界議員梁繼昌助理，工作已經好繁忙，如果做埋召集人真係唔得掂，所以佢決定連副召集人都唔做。
而另一名副召集人沈偉男都會退下火線，估計兩個副召集人位，會分別由現任召集人楊政賢同關注同志平權嘅岑子杰頂上。