正所謂，人不為己，天誅地滅，商界要求減稅聽得多，自動請纓要求加稅大家又聽過未？唔係講笑，真係有咁嘅事。
係咁嘅，由港大學者周永新團隊撰寫嘅全民退休保障研究報告日前出爐，建議設立全民老年金制度，其中引起最大爭議嘅係引入「薪俸老年金稅」嘅建議，打工仔要喺強積金之外供多份，而僱主亦無喇喇增加成本，唔反對至奇喇。正如有商界人士話齋，老年金稅實施後，大型企業分分鐘要為幾百甚至幾萬名員工供款，擔心長遠會削弱競爭力，與其係咁，不如稍為增加利得稅仲實際，例如百分之零點五至百分之一，一來比較簡單，二來可以免除行政負擔，商界應該可以接受咁話。
即係咁，香港人口日漸老化，全民退保已討論咗十幾年，社會早有共識，勢在必行。問題係依家拋出嘅方案，僱主同僱員固然齊齊被開刀，中產更加係最大受害者，新稅項唔單止令中產生活負擔百上加斤，仲變相由中產人士供養冇工作嘅人，有違社會公義。你話嘞，一個方案出台後引起咁大爭議，未見官先打三十大板，點可能成事吖。
唔怪得有人質疑當局刻意製造爭拗，令全民退保拉倒收場，雖不中亦不遠矣。冇錯，全民退保必須由整個社會共同承擔，呢點係無可厚非，只不過咁喎，睇勻成份報告，政府除咗一次過注資五百億元外，乜嘢承擔都冇。更離譜嘅係，港府不斷玩「狼來了」嘅把戲，聲稱實行全民退保可能令結構性財赤提早出現，呻窮呻到樹葉都落埋咁滯，爭在未掉番轉頭問市民攞錢咋。
實情係點呢？研究報告推算老年金制度二○四二年有「乾塘」危機，其實所謂乾塘，係指支出超過收入，而唔係完全無水，而泵水嘅辦法有好多，包括加徵利得稅又或者港府再注資等。老實講，港府坐擁金山銀山，淨係財政儲備都超過七千億元，幾十年後至為全民老年金加碼，應該游刃有餘，咁都唔肯，太縮骨啦啩。
講開縮骨，全民退保關乎七百萬市民嘅利益，港府應該責無旁貸至係，點知家陣全部推畀學者去研究，港產官僚一個二個好似隱咗形咁，話就話持開放態度，實際上將個波交畀學者，自己匿喺幕後關人個關，咁樣唔係縮骨又係咩呀。
始終都係嗰句，政府靠得住，豬乸會上樹。港產官僚冇膊頭、冇腰骨，一味諗縮數，市民想老有所養，老有所依，睇怕都要自求多福咯！