中華廠商聯合會（廠商會）今年換屆，早前會長之爭已率先掀起種票疑雲、副會長顏吳餘英臨時退選等風波，最後由唔選又選的副會長陳淑玲，同另一副會長李秀恒二揀一產生。近期爭選會長風波似乎平靜咗，但查實波濤暗湧。被視為會長爭霸前哨戰的會董選舉已進入戲肉，聽聞今次共有一百三十幾人爭奪一百個會董位，競爭相當激烈。
其中以廣東社團總會前主席王國強（KK）及飛達帽業副主席兼行政總裁顏寶玲加入戰團，最令廠商會中人感到意外。KK係承包工程為主的金城營造主席，同廠商點都扯不上關係。至於飛達號稱係全球最大帽子生產商，廠房遍布世界多個國家，員工數以萬計，規模咁大，梗係非一般廠商咁簡單啦。
雖然廠商會早年已經修改章程，連金融服務業都可以加入做會員，但縱橫政商界嘅KK同顏寶玲突然「屈身」廠商會爭做會董，實在令人費解。尤其係KK啱啱卸任廣東社團總會主席，聲稱淡出前線，九月仲會重返校園讀書，話口未完又靜雞雞入紙競逐會董，最惹人猜疑。我哋問過佢點解突然鍾情廠商會？KK話：「有次同朋友食飯講開，佢哋話不如一齊入紙選會董，我咪選囉！」
一百位會董負責選出會長，邊個候選人愈多會董支持就自然勝出，所以不難想像點解咁多人爭做會董。聽講有人建議增加會董席位，但未取得會內人士共識。