政情：侯志強趕返港 收400萬新車
港區全國人大代表、立法會議員及各界人士過去兩日齊赴深圳出席政改座談會，其中身兼立法會議員嘅新界鄉議局主席劉皇發（發叔）更係一連兩日都有出席，尋日更率領鄉議局副主席林偉強、十八鄉鄉事委員會主席梁福元及上水鄉事委員會主席侯志強等一共七名鄉議局代表，齊齊出席尋日早上舉行嘅社會各界政改座談會。發叔被問到點解一連兩日出席座談會，佢就話係去湊熱鬧，因為夠高興喎。
兒子送禮賀父牛一
講到高興，點都唔及侯志強高興，皆因佢尋日朝去完深圳參加座談會後，中午返港後就收到兒子送贈嘅Bentley（賓利）一五年新款豪華房車，售價超過四百萬元。侯志強話，其實架新車係兒子送畀佢嘅生日禮物，兒子早就揀定車款，佢只係揀顏色喎。不過，兒子訂車時就特意訂埋佢平時用慣嘅車牌號碼，認真細心。