政情：廢鑊閂門唱歌 遲早執包袱
平等機會委員會（平機會）早前展開歧視條例「四合一」檢討諮詢，點知惹來多方批評，唔少人質疑諮詢文件係「魔鬼在細節中」，將矛頭指向平機會主席周一嶽（周一鑊）。有政黨尋日就聯同九個中小企商會召開記者會，怒插周一鑊「自己閂門唱首歌」兼「偷雞摸狗」，增加中小企營商負擔之餘，仲質疑平機會權力過分擴張，話佢冇資格做主席，如果風波繼續發酵，睇嚟佢執包袱都係遲早嘅事。
「事實婚姻難界定」
平機會諮詢包括將事實婚姻，即係兩個人無結婚但又好似夫婦咁生活嘅關係，都納入為歧視保障範圍。多個中小企商會就批評，事實婚姻難以界定，咁樣係變相要僱主認同同性或異性同居，當中僱主為僱員及其家屬提供嘅醫療等福利，唔知要增加幾多。香港中小企經貿促進會會長張川煌話：「個個都同居得，咁婚姻法要嚟做乜」，要求平機會收番條例。香港中小企業工商聯合會主席曾南更話：「無啦啦無結婚，就可以攞僱主利益，好慘！」
諮詢又建議僱主除咗要控制僱員唔歧視，仲要規管顧客行為。香港大中華中小企業商會創會會長雲海洪就話，如果店員招呼不周、店內有同性戀嗌交但處理得唔好、甚至唔整蛋糕畀同性戀者，隨時都會被人告。會上播出去年周一鑊嘅錄音回應，周一鑊er咗幾er後，先話唔幫同性戀者整蛋糕有可能違反條例，仲叫「一係你摺埋」添，所以班中小企唔氣頂就假嘞！
「咁嘅人點做主席」
雲海洪仲質疑周一鑊「自己閂門唱首歌」，一直都冇同中小企溝通，又質疑平機會權力過分擴張，要政府檢討吓。捍衞家庭價值大聯盟召集人吳志堅就質疑，周一鑊「偷雞摸狗」，趁暑期好多人外遊期間做諮詢，用事實婚姻包裝同性婚姻，又漠視中小企同市民意見，對影響營商環境掩耳盜鈴，「佢係咪要將自己大愛，要大家幫佢找數？」雖然周一鑊話自己冇立場，但吳直指佢「立場清晰到不得了」，係嚴重失信，擘大眼講大話，「咁嘅人點做主席？」