有功爭住領，有鑊齊齊卸，係官場常態，大家早已見怪不怪，估唔到家陣竟然發展到狗咬狗骨嘅地步，唔到你唔服。
係咁嘅，私隱專員蔣任宏尋日發表網誌，話私隱專員公署較早前發表人對人直銷電話嘅公眾意見調查結果，呼籲當局設立拒收人對人直銷電話登記冊，點知隨即收到商務及經濟發展局來信，質疑調查結果嘅準確同可靠度，又批評署方冇事先通知，局方無責任跟進有關建議喎。蔣任宏不甘示弱，強調今次調查同以前一樣，都係委託港大進行，調查方法亦已列於報告；至於冇事先溝通，佢就話報告只係重申三年前嘅建議，所以唔使事先通知，仲話對商經局來信感到驚訝添。
嗱，呢篇網誌洋洋灑灑數千字，矛頭直指商經局，可謂火力十足，拳拳到肉，令人嘆為觀止。不過咁，商經局同私隱署好似細路仔嗌交咁，你話我唔啱，我話你唔着，到底誰是誰非，市民冇興趣知道，淨係知道真人直銷電話無日無之，隨時有人打嚟問你使唔使借錢或者做美容，早已不勝其煩，當局究竟幾時至肯規管呢？飽受滋擾唔在講，最大鑊係分分鐘墮入消費陷阱。消委會今年上半年收到超過三百宗直銷電話投訴，較舊年同期激增六成，當中涉及旅遊、飲食會籍、電訊……五花八門，無奇不有，問題都咪話唔嚴重。
話時話，廣告式促銷電話問題其實唔係今時今日發生，當局迫於民意壓力，○七年推出法例加強規管，容許市民登記拒收電話推銷，弊在做啲唔做啲，藉口保障就業同業界利益，拒絕將人對人直銷電話納入規管，咁搞法有咩法子唔亂象叢生吖。港產官僚敷衍塞責，對市民私隱長期被侵犯無動於衷，咁都算嘞，依家仲要同私隱署狗咬狗骨，互扯貓尾，完全當市民透明，有冇再離譜啲呀！
不過話又講番轉頭，咪睇私隱署義正辭嚴，懶係為民請命咁，其實佢哋保護市民私隱不力，只係五十步笑百步嘅咋。本報曾踢爆內地多個網站公然兜售港人私隱資料，署方居然以無權管轄境外機構為由，一卸了之，連通知內地部門都嫌費事。仲有吖，有手機應用程式聲稱可搜尋個人有冇破產或刑事紀錄，擺明侵犯個人私隱，署方竟然隻眼開隻眼閉，任由有關程式活躍超過一年至取締。私隱署有口話人冇口話自己，簡直笑大人個口。
一句到尾，商經局同私隱署有咩恩恩怨怨，唔該閂埋門四四六六拆掂佢，與其嘥時間罵戰，不如做啲實事保障市民私隱好過喇。特別係商經局局長蘇錦樑呀，既然夠膽接受冰桶挑戰，就唔好不務正業，連自己份工都做到甩甩漏漏！