新界鄉議局研究中心成立咗半年，但似乎唔多覺有咩研究成果，皆因新界黨組唔成，研究中心又可以研究啲乜呢？至於局內人又點睇呢？有鄉紳就笑言，真係唔知呢個研究中心做緊乜喎。嘩！據聞依家擔任研究中心主任嘅係鄉議局執委薛浩然，呢個職位每月領薪七萬多元喎，若研究中心乜都冇做，係咪要問責呢？抑或只係佢未向班鄉紳匯報研究成果？
鄉議局年初撥款一百萬元去成立研究中心，話用嚟做組黨前期工作，包括聘請研究員同購買器材。半年過去喇，據聞依家研究中心仍然由發叔嘅妹夫薛浩然打骰，中心在六月又喺招聘網站刊登廣告，話要請研究員或助理喎。雖然我哋唔太清楚呢啲研究員同助理嘅月薪有幾多錢，但按照廣告上列明嘅要求，包括要求調查員有碩士或博士學位等資格，相信人工都有番咁上下。
研究中心仝人都有唔錯嘅薪水，查實又做咗啲咩研究呢？有鄉紳就話，真係唔知佢哋做緊乜。莫非研究中心秘密做緊研究？如果有努力做研究嘅話，真係要向班鄉紳匯報下啲工作成果，免得大家產生任何誤會啦！