中環出更：淋洗米水 「星星」唔大嘥
席捲全球嘅「冰桶挑戰」玩咗成個星期，要找數嘅都找得七七八八，環境局局長黃錦星（星星）尋日就拉埋政治助理區詠芷（Michelle）食水尾，接受立法會議員梁繼昌同莫乃光挑戰。雖然星星着住件「大嘥鬼」T恤應戰，但其實一啲都唔浪費，首先水桶係商務及經濟發展局局長蘇錦樑前日用過嘅，食水就用雨水同食肆洗米水代替，連用來營造冰粒效果嘅冷凍劑都係由同事提供，夠晒環保。
笠帽玩 相當錫身
第一個吃螃蟹的人是勇士，冰水兜頭淋咗咁多日大家都見悶，唔少人仲開始質疑籌款活動係玩多過做善事。出哂名慳嘅星星就善用天時地利上位，以環保做包裝，寓淋冰水於教育市民惜物減廢、循環再用，仲捐錢予美國肌萎縮性脊髓側索硬化症協會（ALS Association）同香港肌健協會，唔係得個玩字o架。
不過，二人去到「找數」一刻似乎相當錫身，先係星星笠帽擋冰水，Michelle就用洗米水淋身當護膚，頭半桶水仲倒咗落身後，難怪星星淋完水仲識大叫「好精神」喇！
卓妮