古人話，「入其俗，從其令」，意思即係入鄉隨俗咁解。可惜吖，咁簡單嘅道理，部分內地旅客硬係唔明，嚟到香港唔止唔肯入鄉隨俗，仲聲大夾惡，甚至動手動腳，搞到衝突不斷，醜聞多多。所以話，中港矛盾愈演愈烈，唔係冇原因o架。
呢嗱，日前一個內地旅行團到紅磡購物，女導遊提醒團友唔好亂拋煙頭，點知另一團有個昂藏六呎嘅男團友居然發爛渣，除咗用普通話喝罵女導遊，仲衝前叉頸，搞到女導遊差啲窒息，要送院救治，而嗰位旅霸就被警方帶走調查。唉，何必呢！
無獨有偶，同一日又有另一單類似事件，地點係長沙灣。一名來自廣州嘅男團友喺購物店內準備吸煙，導遊見狀上前勸阻，仲苦口婆心向男團友解釋香港實施室內禁煙，點知男團友唔領情不特止，仲郁手推撞，同團另一位團友不值其所為，加入勸解，雙方喺街上扭作一團，警方到場先肯和解。
即係咁，內地旅客唔熟悉本港法律而有不文明行為，一啲都唔出奇，導遊向團友好言相勸，無非出於好心，點知搞到初則口角，繼而動武，簡直匪夷所思。正所謂，面係人哋畀，架係自己丟，內地旅霸蠻不講理，所作所為完全超出正常人嘅底線，中港矛盾激化，唔可以完全怪晒香港人o架。
唔好以為只係個別事件吖，本港四日內已經發生三單喇。據業內人士所講，本港導遊遭內地團友襲擊幾乎每星期都有一宗，為免影響行程，亦為保住飯碗，導遊多數息事寧人，加上部分訪港內地團冇按照旅遊業議會「一團一導遊」嘅規定，萬一被揭發違規，數萬元罰款可能轉嫁到導遊身上，導遊投鼠忌器咯喎，咪令到內地旅霸得寸進尺，變本加厲囉。
呢，好似去年五一黃金周咁，有個內地團不滿旅遊巴遲到一粒鐘，居然拒絕上車，有旅霸仲對住記者鏡頭喊到聲嘶力竭，要求賠償三千元加三晚酒店住宿，直情好似強盜咁。仲有吖，早前有七十多名內地旅客不滿本港航班延誤，「佔領」客機近十八小時，直到每人獲賠八百元先肯罷休，令人嘆為觀止。最醜怪嘅係，內地旅客丟架丟到國際，歐洲有啲酒店頂佢哋唔順，寧願唔做內地客生意，你話係咪丟架吖？
咁講啦，部分香港人刻意針對內地旅客，又「驅蝗」又「拖篋」，固然唔啱，但內地旅霸無理取鬧，苛索無度，亦的確令人忍無可忍。總而言之，人必自侮而後人侮之，如果內地同胞連尊重自己、尊重他人都唔識，咁就唔好怪人哋驅蝗喇！