政情：公民講場：財爺淨識喊驚 市民上唔到車

財政司司長曾俊華（鬍鬚曾）過去一段長時間，除咗話美國快將加息，叫市民「上車」買樓小心風險外，又話連同外國經濟同政局不穩、本地嘅政改爭拗等，隨時會引發一場「完美風暴」，吹冧香港經濟、股市同樓市。如果過去有相信鬍鬚曾「狼來了」嘅市民就真係中晒招嘞，事關樓價不斷攀升，喺政府推行嘅樓市辣招下，更加令到啲細價樓值爆升，令到原本諗住儲夠錢「上車」嘅市民都望門興嘆。奇就奇在，鬍鬚曾除咗寫網誌喊驚之外乜都冇做過，但尋日一項民調竟然顯示佢嘅評分上升添，莫非市民真係以為官員唔做就會唔錯？