政情：龐愛蘭夜練二胡怕擾鄰
二胡樂聲哀怨淒美，若喺夜深人靜時聽到二胡聲，應該都幾得人驚。沙田區議員龐愛蘭（Scarlett）今年十一月底將會同一班傑出青年為籌款晚宴表演，但佢自認從未掂過樂器，加上依家一星期先至上堂一次，所以要勤加練習，最近就經常於夜深時分喺屋企練習拉二胡。
專登買弱音器
不過，拉唔成調子嘅二胡聲，喺夜晚都幾騷擾鄰居，尤其係喺農曆七月鬼節，二胡聲零舍令人毛骨悚然。所以Scarlett特登買咗個弱音器，盡量將擾人聲浪收細。
究竟係咩籌款晚宴令到唔識樂器嘅Scarlett要「臨陣磨槍」呢？佢笑笑口話，係香港防癌會同傑青慈善基金遲啲會搞籌款晚宴，仲特別成立咗一支樂隊叫做「傑青十二樂坊」，成員包括香港前劍擊冠軍何嘉麗等十二位男女傑青，Scarlett係成員兼團長，大家齊齊拉二胡。樂隊個名稱同十二位索女組成嘅樂坊咁相似，所以一眾傑青亦會學佢哋喺台上彈琴嘅姿態，擺明係搞笑版啦！