政情：陳家珮柬埔寨跑馬拉松
好多人以為政界人物日理萬機，應該會少運動多應酬，但其實分配時間好講個人紀律，有心一定做到。好似做咗南區區議員無耐嘅新民黨陳家珮（Judy），一向係長跑發燒友，原來佢鍾意去唔同國家跑馬拉松，早前就飛咗去柬埔寨吳哥窟，以長跑方式感受當地風土人情。
每年出外比賽
Judy話，其家族有個傳統，就係一年最少去一個地方跑馬拉松，但最初只係爸爸跑，佢同媽咪只企喺旁邊做啦啦隊，但久而久之發覺太悶，就自己加入埋跑手行列，點知一跑不可收拾，愛上長跑呢項運動。現時全家人每年飛去唔同國家參與馬拉松。
早前Judy全家去咗柬埔寨跑馬拉松，條賽道仲要圍繞住吳哥窟，簡直係將運動與歷史結為一體。不過，佢話返港後都要加操，因為佢年底仲要參加一個沙灘長跑賽。現時佢已加入咗南區長跑會，積極備戰。