政情：從不用手機 李澤培企硬
呢個世代好多人對住部手機多過對人，瓣數多嘅甚至日日帶住兩三部手機出街。不過，義務工作發展局主席李澤培（JP）就自爆從來未擁有過手機，即使親朋戚友要搵佢都係打去佢公司或屋企，對機不離手嘅港人來講，JP簡直係「史前動物」。
JP尋日以國際商會—中國香港區會主席身份搞咗個茶敍，公布商會嘅政改方案。JP除咗係力寶有限公司董事，仲曾任多項公職，理應機不離手，但七十幾歲嘅JP就相當自豪咁話自己從來唔用手機，笑言如果打晒公司同屋企都搵佢唔到，就證明佢真係唔得閒喇。
講番商會嘅政改方案，話明「國際」商會，佢哋建議特首選舉要符合國際標準兼全民提名選舉委員會同特首，甚至廢除立法會功能界別，似乎同香港絕大部分商會唱反調喎！