政情：種票新招 一屋同姓避追查
今屆區議會及立法會選舉爆出歷來最大規模嘅種票醜聞，唔少政黨中人喺翻查臨時選民登記冊後，發現有唔少「一屋多姓」、「幽靈單位」及假地址等懷疑種票個案。選舉事務處事後推出連串措施打擊種票，加上部分種票人士被法庭裁定罪成，令人以為政府已經成功杜絕種票行為。不過，明年底又到區選，唔少地區中人認為依然有人暗中喺舊區大廈種票，再將同姓選民放喺同一間屋，藉以避過選舉事務處抽查。
選民冊放上網無助打擊
三年前臨近區議會選舉，九龍西多區大廈被揭發種票事件，例如美孚新村一單位出現「一屋七姓十三票」嘅奇怪現象、黃埔花園出現天台單位種票、京士柏選區出現連環種票疑雲等。而之後嘅立法會選舉中，位於北角同西營盤唔少大廈單位被傳媒揭發有種票情況，除咗有地舖出現「五姓六票」外，更有選民收到多份由選舉事務處寄出嘅投票通知書，懷疑有人假借其他人嘅地址登記做選民。
選舉事務處其後多次聯同執法機構打擊種票行為，總選舉事務主任李柏康更多次揚言當局會加強抽查可疑個案，最近更表明會將整份選民登記冊擺上網畀公眾查閱，以收阻嚇作用。雖然當局諗咗唔少絕世好橋打擊種票，暫時成功令種票行為絕迹，但好似早幾個月東區區議會南豐選區補選，民主黨趙家賢都曾經向選舉主任投訴，話區內出現八十幾宗懷疑種票個案，但選舉事務處經檢視後，都係搵唔出有種票迹象。
區選臨近 恐爆更大醜聞
不過，有地區中人估計，選舉事務處近期之所以搵唔到有大規模種票例子，係因為相關人士今次種票時非常小心，盡量避免將唔同姓氏嘅人士放埋同一間屋內，反而將相同嘅姓氏擺埋一齊，避免出現「一屋多姓」嘅情況，惹選舉事務處懷疑。
除此之外，佢哋更加改變過往周圍種票嘅做法，改為喺舊樓或以劏房戶聞名嘅大廈種票，就算被揭發該大廈有種票情況，涉事人士都可以用「已經搬走咗」等理由蒙混過關，加上劏房租戶不時轉租客，選舉事務處就算想查都無從入手，唔使擔心會觸犯法例。隨住區議會選舉臨近，如果選舉事務處唔再認真抽查，畀人偷雞種到票，選舉怎能公平公正呢？