中環出更：陳維安遊非 無懼伊波拉
西非國家畿內亞、利比里亞及塞拉利昂近月爆發伊波拉疫症，港府喺機場向來自呢三個國家嘅旅客派發宣傳單張，但就未有好似其他國家咁禁止該國旅客入境。雖然疫情至今未有受控嘅迹象，但立法會秘書長陳維安（Kenneth）上星期依然唔怕死走去非洲旅行，仲近距離接觸野生動物，唔通佢唔怕感染伊波拉病毒？
全程遠離西非
Kenneth透露，爸爸初時聽到佢話要去非洲旅行都非常擔心，佢就不斷解釋話自己同家人會先去東非肯尼亞睇動物大遷徙，然後再去納米比亞欣賞沙漠景致，全程遠離所有西非國家，所以佢話唔驚會感染到伊波拉病毒喎。
講起世界知名嘅動物大遷徙，Kenneth話旅程中見到一大群牛羚集體過河，非常壯觀。不過，由於佢入住嘅帳幕酒店設備比較落後，每晚沖涼前要預約，等工作人員先行將水注入浴室嘅儲水器內，先至可以沖涼。加上沙漠地方水源稀少，每次沖涼只可以沖四分鐘，之後就會自動無水，如果成身都係泡泡先發現無水出，咁就唔知點算嘞。
卓妮