中環出更：冰桶挑戰 政商學界齊「找數」
近日熱爆全城嘅「冰桶挑戰」（Ice Bucket Challenge）蔓延到政商界及學界，一眾局長、議員淋冰水籌款。尋日中午先有商務及經濟發展局局長蘇錦樑（Greg蘇）帶埋副局梁敬國及政助陳百里齊於添馬公園「找數」，之後又有立會議員莫乃光、梁繼昌及「慢必」陳志全等，就連中大校長沈祖堯都淋埋一份。
冰桶挑戰上月起於美國瘋傳，以兜頭淋冰水拍低短片為證，再點名挑戰其他人，若廿四小時內唔接受挑戰便須向美國肌萎縮性脊髓側索硬化症協會（ALS Association）捐款一百美元，亦有人同時接受挑戰並捐錢。前晚被點中後宣布應戰嘅Greg蘇，尋日仲帶埋投資推廣署署長賈沛年及海洋公園前主席盛智文一行五人參與。
Greg蘇話多謝香港電視主席王維基點佢名，仲拎起包冰話贈王維基「冰釋前嫌」四個字，希望大家多啲溝通喎。佢之後點咗名向藝人黎明等人下戰書，但黎明隨即回應話唔會淋冰，但會捐一萬元予ALS會。
而莫乃光同梁繼昌就一齊應戰，梁繼昌話，關注到國際上嘅武裝衝突事件，所以佢除支持香港肌健協會及ALS會外，仲會捐出一百美元畀國際特赦組織及聯合國兒童基金會。
沈祖堯與學生玩埋一份
此外，中文大學校長沈祖堯都喺校園內「找數」，喺一班中大職員及學生見證下自淋冰水，並會向ALS會捐款。淋冰水後嘅沈校長則向現任中大學生會會長張秀賢、前會長鍾耀華及楊政賢下戰書，更承諾若三位同學都能接受挑戰，便會為每位捐出一百美元予高錕慈善基金幫助腦退化症病患者。
特首梁振英亦有被點中，但佢就回覆只會以捐款方式支持活動，向ALS捐出一百美元及香港肌健協會捐出一萬港元。水務署則表示支持公益活動，認為可在短時間內吸引大量參加者並籌得大筆捐款給有需要人士，加上大部分人使用較細小水桶進行，相信冰塊及水都用得其所。
卓妮