條例過時任由商戶拒收 神沙冇碇使

「餐廳唔收、小食店唔收、生果檔都唔收，咁我儲埋啲毫子點算？」詹小姐因毫子全無出路而將其儲起，隨着近年愈來愈多商戶均標明「拒收毫子」，手上的「神沙」即愈積愈多，「啲舖頭找毫子畀我哋就得，但佢哋就有權唔收毫子，你話係咪唔公平？」

詹小姐指面對商戶拒收毫子，只能將囤積於家中的「神沙」支付公共交通工具費用，因應法例規定每次使用毫子的面額不能多於兩元，當車費不斷增加後，要用去手上的毫子亦愈來愈困難，「九十年代搭26M（九巴）都仲係兩個半，依家都加到四個九啦！物價高咗咁多，政府都仲要限死我哋每次只可以用兩蚊毫子，條法例係咪有啲過時呢？」

一毫、二毫及五毫等硬幣雖屬本港法定貨幣，但不少商戶卻選擇拒收。

市民點睇 陳小姐「屋企都儲落唔少毫子，希望政府可以修訂條例，最多畀用兩蚊已經有啲過時。」

毫子付款 每次不可逾兩元

金融管理局發言人承認，過去一年共接獲九宗拒收硬幣投訴，但指《硬幣條例》雖規定市民如需使用一毫、兩毫及五毫硬幣，每次支付款額不能超過兩元，但法例沒有賦予當局權力要求商戶在交易中必須接受硬幣，亦沒有規管硬幣支付交易時的使用數量。發言人續稱，今年九月將推出流動硬幣收集車試驗計劃，以增加硬幣流通性，減少鑄幣需求。

消費者委員會發言人亦指，商戶可透過口頭或書面清晰表示拒收毫子，但不能無故多收金錢。

派流動車收集 成效難估計

「收唔收、收幾多毫子決定權喺商戶度，市民根本冇得揀，難免會覺得唔公平！」立法會經濟發展事務委員會委員陳恒鑌認為，隨着通脹升溫及八達通普及化，市民對毫子需求相對下降，加上部分銀行會就硬幣存款收取手續費，令商戶拒收毫子情況加劇，市民手上的「神沙」亦難尋出路。

陳恒鑌續稱，金管局雖將推出硬幣收集計劃，透過流動車收集市民手上「神沙」，但認為計劃尚在試驗階段，成效難以估計，「依家好多商戶都唔收毫子，入銀行又要畀手續費，金管局先要自己去收集硬幣，但真係唔知能否長遠解決硬幣唔流通問題！」陳建議當局適時檢討現行硬幣條例，以平衡商戶及市民利益。

記者：黃芷君 攝影：伍思明