政情:「剛」下火線 零售界混戰

政改三人組講到一六年立法會選舉辦法只會微調,唔會大變,意味功能界別選舉起碼會存在多四年。由○四年開始出任批發及零售界議員嘅自由黨方剛,因年紀問題極大機會會退下火線,觸發業界群雄並起。除咗「屢敗屢戰」、早前仲加盟咗新民黨嘅「假髮大王」趙振國預計會再次出選,近日有傳零售管理協會主席麥瑞琼亦有意出戰,並聲言已得到方剛祝福添。不過經過我哋明查暗訪,自由黨內部已「欽點」咗該黨嘅東區區議員邵家輝接方剛棒,惟邵家輝喺業內唔算出名,要順利接棒有一定危機,一場大混戰肯定無可避免。

知情人士疑麥參選係假消息

批發及零售界過往係自由黨嘅天下,九七回歸至今都冇失過手,其中喺○四年開始接周梁淑怡棒嘅方剛,三次參選有兩次大敗對手,上一次更喺無對手下自動當選。不過方剛現年已七十一歲,一六年換屆時更達七十三歲,除咗鄉議局主席劉皇發之外,係年紀最大嘅現任議員,加上佢近年身體時有小毛病,據聞方剛今屆退意已決,正四出物色合適接班人。

近日有消息指方剛搵咗喺業界議題上同佢合作無間嘅麥瑞琼接棒,但亦有分析指雖然麥瑞琼喺業內有一定分量,但佢本身只係打工仔,唔似方剛咁做老細,好難說服公司畀佢全職或兼職從政。麥瑞琼就向我哋斬釘截鐵咁話無意參選,形容自己唔係政治人,若有意參選嘅話,一早喺後生時做咗。

有知情人士更懷疑,有人故意發放麥瑞琼參選呢個假消息,係為咗保護方剛嘅真正接班人。我哋綜合各方消息,發現現年四十四歲、本身從事建材貿易生意嘅邵家輝,可能先係「真命天子」。

自由黨力捧邵 但業內唔出名

消息指出,邵家輝擁有豐富議政經驗,曾於各級選舉為黨友助選「抬轎」,係該黨力捧嘅第二梯隊之一,可惜自由黨直選表現一向麻麻,佢先遲遲未能上位。但問題係佢喺批發及零售界內唔算出名,一旦該黨拍板推薦佢參選,肯定會招來大批挑戰者。邵家輝接受我哋查詢時,對係咪參選不置可否,多次強調須聽從黨嘅決定同安排喎。

第一手消息請下載on.cc東網iPhone/iPad/Android/Windows Phone Apps