中環出更：無家者慈善賽 長毛踢到碌地
大熱天時即使汗流浹背，亦無損市民對足球運動嘅熱愛。和富社會企業及香港社區組織協會合辦嘅無家者世界盃香港區慈善賽決賽尋日舉行，卓妮尋日都有到場湊熱鬧，見到今次賽事除咗有二十四支隊伍參與，兩名立法會議員梁國雄（長毛）及單仲偕亦有落場踢，期間長毛又踢又攬，一度碌咗落地，然後攤大雙手狀甚無辜，而單仲偕就話自己平日冇乜點踢。
和富社會企業會長李宗德及香港社區組織協會主任何喜華尋日都有現身，不過雙雙都冇落場，其中何喜華自言比較鍾意游水同踩單車，又話同兩、三個朋友夾埋一齊踩單車就容易得多，相反要湊齊一班人踢波比較難。
何喜華愛游水踩單車
何喜華其後提到踩單車嘅話，去內地廣東省一帶就最適合，一來風景靚，二來車又比較少，佢哋通常一踩就踩足幾日，每日七至八小時，加上平日佢自己嘅探訪工作經常出入舊式唐樓，每棟大廈都要行幾層樓梯，數數手指一日起碼行幾十層，似乎身形咁標準係咁練成。
卓妮